Стивенсон VS Гвоздик – Жекпе-жек уақыты белгіленді

Канадалық «қара дәу» Адонис Стивенсон мен украиналық Олександр Гвоздиктің биыл 1 желтоқсанда Квебекте кездесетіні белгілі болды. Сол-ақ екен, көпшілігі бұл «Суперменнің» соңғы жекпе-жегі болатынын айтып жатыр. Стивенсон расымен де жеңілуі мүмін бе?

Күні кеше 41 жасқа толған Адонис Стивенсоннің бірінші ауыр салмақ дәрежесінде WBC чемпиондық белбеуін көтеріп келе жатқанына бес жылдан асыпты. 2013 жылы Чэд Доусоннан тартып алған. Содан бері шаршы алаңда тұп-тура 10 айқас өткізген. Тек соңғысында швециялық Баду Джекпен тең түсіп қалғаны болмаса, қалған жекпе-жектерінің барлығын өз пайдасына шешіпті. Жалпы, 2006 жылдан бері шаршы алаңда жүр. Осы аралықта 31 кездесу өткізіп, біреуінде тең түскен, тағы біреуінде жеңілген. Қалғанының барлығын өз еншісіне жазыпты.

Ал канадалықтан тұп-тура 10 жасқа кіші Олександр Гвоздиктің шаршы алаңда жүргеніне бес жыл да болған жоқ. 15 кездесу өткізіп, бәрінде жеңіске жеткен және 12 қарсыласын нокаутқа түсірген. Мамандар Гвоздикті чемпиондық белбеуге әбден лайық боксшы санайды.

Дегенмен, жекпе-жектің Канадада өтетінін ескеру қажет. Стивенсон Канададан тысқары жерде тек өмірінде бір рет жұдырықтасқан. Жеңіліп қалғаннан кейін шекара асуды жөн көрмеген. Сондықтан, өз алаңында Адонис жанкүйерлерінің ғана емес, төрешілердің де қолдауларына ие. Әйтсе де, мұның алдындағы жекпе-жегінде Баду Джектен жеңіліп қала жаздағанын да айта кеткен жөн.

Қалай десек те, бұл айқас қызықты болғалы тұр. Оның үстіне, Дүниежүзілік бокс кеңесі де бір чемпионнан жалыққан шығар.

If you have found a spelling error, please, notify us by selecting that text and pressing Ctrl+Enter.

Leave a Reply

Thanks!

Our editors are notified.