Сондерс үшін Головкиннің техникасын аяймыз

Келесі айқасында Сауль Альварестің орнына Головкинге Билли Джо Сондерсті ұсынса, көрер ме едіңіз? Маған бұл жекпе-жек қызық емес. Геннадийдің техникасын аяймын.

«Головкин, қайдасың? Головкин, шық бері!», – деп айқайлап жатты Квебекте канадалық Давид Лемьені жеңген Билли Джо Сондерс.

Иә, өз жанкүйерлерінің алдында Лемьеге қорлық көрсеткен Билли шынымен де ТОП-тардың қатарына еніп келе жатқанын дәлелдеді. Бірінші раундтан соңғысына дейін тыным таппай, қолды-аяққа тұрмаған британдық боксшы шаршы алаңда билеп те жүрді, сериялық соққылар да жасады, жергілікті көрермендердің де титығына тиіп үлгеріп жатты. Нағыз бабында екен. Он екінші раундта да Лемье өз аяғына шалынуға шақ қалып, әзер жүргенде мұның шаршағаны да білінбеді. Дегенмен, Давид өз жанкүйерлерінің алдында масқара болғаны үшін біріншіден, өзі кінәлі. Бірінші раундтан-ақ сериялық және комбинациялық шабуылдарға иек артудың орнына бірден нокаутқа түсіремін деп бір соққыға күшін салып жатты. Әлбетте, әккі Сондерске мұның бірі де тиген жоқ. Үш төреші де Биллидің басымдығын мойындады. Тіпті, біреуі 12 раундты да британдықтың еншісіне жазыпты. Заңдылық.

Енді Билли Джо Сондерс қазақстандық Геннадий Головкин немесе мексикалық Сауль Альвареспен айқасқысы келеді. Жекпе-жек аяқталған бетте «Головкин, қайдасың? Шық бері, Головкин!», – айқайлап жатты Сондерстің өзі. Дегенмен, бұл кездесу көрермен үшін, нақты айтқанда НВО үшін қаншалықты қызық болмақ?

Кәсіпқой бокста шаршы алаңның көлемі төрт жағына шаққанда кем дегенде 5 метр, максимум 6 метр болуы керек. Дегенмен, Сондерспен жекпе-жек ұйымдастыру үшін Головкинге оны көлемі бильярд алаңындай ғана болатын рингке шақыру керек шығар. Сонда ол ешқайда қаша алмайды. Әйтпесе, 6х6 метрлік шаршы алаң Билли үшін тым үлкен. Өзін құдды бір, «Стэмфорд Бридждегідей» сезінеді. Головкин 12 раунд бойы оның артынан қуып, ақыры өзі де шаршап қалуы мүмкін. Қанша дегенмен, жерлесіміздің жасы да 40-қа жақындап келеді. Рас, Геннадийдің бұрыштарды қалай кесетінін, қарсыласын қалай қапы қалдыра алатынын жақсы білеміз. Сондықтан, мен үшін бұл жекпе-жек қызық болмаса да, әдеттегідей таң әлекеуіммен теледидар алдына телміруге дайынмын.

Қанша дегенмен, Головкинге орта салмақтағы белбеулердің толық жиынтығы керек.

If you have found a spelling error, please, notify us by selecting that text and pressing Ctrl+Enter.

Leave a Reply

Thanks!

Our editors are notified.