Данияр Елеусіновтің дебютінен не күтеміз?

Осы жексенбі күні таңертең тағы бір қазақ боксшысы кәсіпқой бокс әлеміне ресми түрде бет бұрып, алғашқы жекпе-жегін өткізеді. Олимпиада чемпионы Данияр Елеусінов жайлы айтып отырмыз. Мұхиттың арғы жағалауына аттанған отандасымыздың алдағы айқасынан не күтуге болады? Сараптап көрсек.

Данияр Елеусінов – еліміздегі ең ақылды боксшылардың бірегейі. Шаршы алаңдағы жұдырықтасу мәнерін айтып отырмыз. Өзіне оңайлықпен соққы дарытпайтын дарабоз. Дегенмен, кәсіпқой бокс – мүлдем басқа әлем. Олимпиада жеңімпазы, әлем чемпионы деген атақтарыңды ұмытып, бәрін басынан бастауың қажет. Егер кәсіпқой бокста титімдей де жетістікке жетпесең, қарсыластарың да сені танымайды. Елеусіновтің алдағы қарсыласы Ноа Кидд те бұған дейін мұндай боксшының бар екенін білмегенін айтып отыр.

Ноа Кидд демекші, бұрынғы жекпе-жектеріне көз жүгіртіп көрген едік, өз салмағын әлі таба алмай жүрген боксшыдай әсер қалдырды. Екі жылда төрт рет шаршы алаңға шығып, 145 фунттан бастап, 154 фунтқа дейінгі салмақтарда жұдырықтасыпты. Елеусіновпен 147 фунтта жұдырықтаспақ. Екеуі кештің шымылдығын ашатындығына қарамастан айқас 6 раундқа жоспарланып отыр. Демек, Эдди Хирн Даниярға сеніп отыр. Әйтпесе, промоутерлердің көбі шәкіртін бірден 6 раундқа тықпайды.

Өзінің сұхбаттарының бірінде Елеусінов алдағы уақытта Эррол Спенс, Кит Турман сынды мықтылармен шайқасқысы келетінін айтты. Әлбетте, бұған жерлесіміздің толық мүмкіндігі бар. Дегенмен, алдымен Данияр 29 сәуір күні Ноа Киддті айқын басымдықпен, ыңғайы келсе, нокаутпен ұту қажет.

If you have found a spelling error, please, notify us by selecting that text and pressing Ctrl+Enter.

Leave a Reply

Thanks!

Our editors are notified.