Айдар Шәрібаев, Франсиско Варгас және басқалар немесе жерлесімізбен бірге шаршы алаңға кімдер шығады?

Сәуірдің 12-сі күні Калифорния штатының Индио қаласында «Golden Boy» промоутерлік орталығының ұйымдастыруымен кәсіпқой бокс кеші өтеді. Бұл кеште жерлесіміз Айдар Шәрібаев пен америкалық Эндрю Канчионың жекпе-жегінен бөлек, тағы төрт айқас өтеді.

Назарларыңызға сол кәсіпқой бокс кешінде шаршы алаңға шығатын боксшылардың жұбымен таныстырамыз.

Алдымен шаршы алаңға калифорниялық Хавьер Падилья мен мексикалық Рикардо Ариас шығады. Аса жеңіл салмақ дәрежесіндегі қос құрдастың (екеуі де 22-де) айқасы 6 раундқа жоспарланып отыр. Кезінде екеуі тең түскен. Бұл реванш.

Одан кейін сегіз раундтық жекпе-жекте филиппиндік Рекки Дюлэй мен жеті жекпе-жегінің барлығында жеңіске жеткен шаршы алаң қожайыны Дженаро Гамес жұдырықтасады.

Осы кеште рингке үшінші айқасқа шығатын жапон боксшысы Шоки Сакайға оңай болмайтын сияқты. Оның қарсыласы – шаршы алаң қожайыны Джонатан Наварро кәсіпқой бокста 13 жекпе-жек өткізіп, барлығында жеңіске жеткен. Соның жетеуінде қарсыласын құлатқан. Сондықтан, жапондық 27 жасар жігіт сегіз раундқа шыдап берсе, риза боламыз.

Төртінші жекпе-жек жерлесіміз Айдар Шәрібаев пен жергілікті Эндрю Канчио арасында өтеді. Ал кештің басты айқасында шаршы алаңға мексикалық Франсиско Варгас пен америкалық Род Салька шығады. «Бандит» деген лақап атқа ие Варгастың жекпе-жектері әрдайым қызықты. Жапониялық Такаши Миюрамен 2015 жылғы кездесуі және Орландо Салидомен 2016 жылғы жекпе-жектері «The Ring» журналының тұжырымы бойынша, жылдың үздік айқастары атанған еді. Бұл жолы да Варгастан бокссүйер қауым адреналинді айқас күтеді. Дегенмен, қарсыласы да оңай шағылар жаңғақ емес. Бұған дейін бірінші жартылай орта салмақ дәрежесінде жұдырықтасып келген. Тіпті, Дэнни Гарсиямен де кездеске. Бұл жекпе-жек 10 раундқа созылады деп жоспарланып отыр. Іс жүзінде қалай боларын 13 сәуір күні таңертең білетін боламыз.

If you have found a spelling error, please, notify us by selecting that text and pressing Ctrl+Enter.

Leave a Reply

Thanks!

Our editors are notified.